Anok beranok ambo daley ni terr. Banyok ko keno gular cuti sekoloh ni? Baso dio lah main nga cuti sekoloh ni, jemeruk lah gular situ sini. Dulu2 x po lah demo gular bekwoh tu pun x nanti ko cuti sekolah ko gapo. Hari biasa, hari Khamis x pun jumaat selaris nah dulu orey bekwoh. Loni mugo masing-masing duk jauh belako, tunggu hari cuti lah baru buleh buat. Tapi kalu dey main 5, 6 tempat gular daley sari, nya main simbor, sero mari cemuh jugok. Kalu keno dekat2 x po lah, makey gular buleh setempat, lepas tu pat lain tu sekadar gi ambil syarat jupo mato harap ko tuey rumoh mari jauh2 ngajok. X sir makey pun x po lah, janji buleh jupo mato. Kalu keno ko bekwoh jauh, mari nga jaley jem pulok, jupo2 semula lah wat kiro lah lagu mano pun.
 
Hok nok bari nyo sini, gular dulu nga loni jauh sangat beza. X soh ambil ko bendo lain lah. Padey ambil atas ngidey jah. Loni pelawok kecek lah payoh doh nok jupo kalu bekwoh makey ngidey. Banyok makey selerak. Ado orey suko makey selerak ado suko makey caro ngidey. Pasal bendo ni subjektif. Loni kok kampung pun banyok doh demo kiro wat katering. Bukey apo, kadey2 demo ni malas nok nyusoh ko orey2 kampung duk koyok bawey, siey daging, kerat lado bagai. Loni pun gular kebanyakan mano2 tempat pun sekat pukul 6 ataupun sebelum ngorib jah x kiro catering ko x catering. Pasal loni kalu maley, hok jong makey gular pun malas doh nok gi, pah tu mikir ko tuey rumoh letih2 x cekak. Dulu2 gular start 10 pagi rapat ko 10 maley. Kadey2 pah ko tengoh maley pun ado lagi demo mari.
 
Sebut pasal makey ngidey ni, mano2 tempat gular jamey ritu style ngidey belako. Bersusun-susun lah neka bungo / taley / duley atas rumoh. Nekar ni pulok hok sendiri nyo ado sebutir duo jah. Hok lebih tu pinjey nga orey. X cukup pinjey nga orey, pinjey hok atas balasoh. 
 
Biasa2 kalu bekwoh dulu, orey tino makey atas rumoh, orey jatey makey tanoh. Bowoh bangsal buluh. Orey2 tino dulu time makey gular paka janggok2. Meh2 paka nok wat rayo. Lecu mulut. Paka geley donat sekerat lengey. X keno edar jangok dio pado pengantin.
 
Makey ngidey ni barey keno cukup gu. Paling x dok 4 orey buleh doh. Paling terik pun 5 orey so hidangey. Kalu x cukup gu, keno tunggu biar cukup baru buleh makey. Cumo bezo makey ngidey ni ukhwah samo masyarakat tu ado. Kalu sudoh makey pun demo x ggaduh angkat punggung tinggal gu lawey makey sorey dop, demo tunggu gu lawey makey sudoh baru lah pakat semuo akat punggung.
 
X soh lah kalu gular dulu x dok jong kako. Dulu x po lah asal gular jah mari nulong selaluh jadi jong kako. Buleh upoh gular supik, pulut kuning sekepal, pitih 4, 5 riyal, kadey2 buleh kain sarung selai jadi doh. Gi mari gi mari jong kako, naik atas rumoh turun tanoh, kain tuala good morning atas bahu, bowok hidangey daley neka, bimbit beledi kecik isi gular. Mato beley2 tengok anok daro. 
 
Menu pat bekwoh dulu, lebih kurey jah belako. Aye masok merah kerat 4, x pun aye percik, daging buku besar, teresek, dalca, gular daging, siro labu x pun siro stelo, beledo sirap bodo, acar dan sambal. Air pulok air sirap jah x dok air pelik2 serupo loni. Air sirap tu kalu gi alah gelap2 jah sikit, jupo lah air sirap pucat. Tawar lembar. Air batu pun sero hawo2 jah, pasal air batu katok daley guni gulo cair habis doh. 
 
Hok sedap sekali kalu keno ko daging buku besar. Mato tu gak duk kherling semacey tunggu nok cobek. Nok cobek mulo2 takut malu orey kato serupo x beso jupo, dey ko gu lawey nya cobek, keno ko daging liat payoh nok cobek, nya wat terbolah paka bubuh daley pingey nasi dio. Baru senggih belako. Gak barey daging buku besar ni barey x leh namboh pasal jong dapur wat stemek cukup2 doh. Jadi jangey panggil jong kako mitok namboh daging buku besar, lamo khey nya rukok beledi gular panas atas palo.

Sekian. Terima kasih....

10 Comments

  1. sedap kenduri zaman dlu2...hidang guna dulang tu...kalo kt klate menu special ada ayam percik sdap

    ReplyDelete
  2. Nostalgia pergi kenduri zaman kecik dulu kat kampung, mmg hidang dalam talam bunga ros ni & lauk dalam pinggan kecik2. Tetamu duduk atas lantai dalam barisan panjang menghadap orang kat depan lepas tu talam letak di tengah2. Antara talam pulak ada teko berisi air untuk basuh tangan.

    ReplyDelete
  3. Sukar untuk dimengertikan ni.

    ReplyDelete
  4. kenangan betul kenduri zaman dulu kan.. sekarang semua buffet je

    ReplyDelete
  5. Oke, tulisan Abang kali ini saya tak paham artinya 😅. Tapi tadi baca komen Abang Faizal, dia pun rasanya tak mengerti 😁.

    Apapun kenduri zaman dulu bagi saya berkesan juga. Ingat cara Orang2 di kampung. Masak lauknya bersama dengan tetangga. Lalu dibagikan ke semuanya.. sederhana tapi enak rasa makanan yg dibuat

    ReplyDelete
    Replies
    1. Kali ini pekat betul loghat Kelantan dalam penulisannya. Saya kalau bicara boleh faham juga, tapi penulisan ini dah lain levelnya.

      Delete
  6. Teringat zaman kanak kanak dulu di Kg arwah ayah di Pontion Johor.. makan nasi ambeng ... Bila tak habis mmg dh disediakan plastik utk dibawa balik.. :D

    ReplyDelete
  7. Pernah rasa pengalaman makan berhidang dan sekarang secara bufet.
    Bagi saya tukang makan takde rasa beza cuma tukang sedia makanan rasa susah untuk asyik kena sedia hidangan.

    ReplyDelete

Thanks for leaving your comment. Please come again. I will visit your blog soon.