Sapo dulu gi sekoloh jaley kaki?

Kalu peringkat budok2 sekoloh dulu, tamboh2 yang tinggal sekitar kampung, buleh kato kebanyakan dey merasa gi sekoloh jaley kaki. Paling x dok pun jarey2 sekali, jaley kaki jugok ko sekoloh kes basikal punoh ataupun basikal bocor tiub. Tapi orey2 dulu dio berhalus sikit, dio x sebut jaley kaki, dio sebut naik 'bas tunjal.'

Walaupun dulu gi sekoloh jaley kaki, namun banyok perbezaan antara dulu dengan loni terutama dari segi infrastruktur. Dulu2 mano ado lagi jaley tar kok daley kampung serupo hari ini. Hari ni buleh kato segenap jaley kampung tar habis licin, walaupun jaley sejengkal katok. Dulu2 kalu nok jupo jaley tar gak, naik tembok ibu baru merasa jaley tar. Budok2 loni kenal ko gapo tembok ibu .Ambo sendiri pun x dengar mano doh loni orey sebut 'tembok ibu?'

Jaley kampung dulu, ado sesetengah kampung tu pesen jaley tanoh meroh. Kalu keno puye kemarau habis naik debu. Kalu keno ko puye hujey lagu ko nok berselut. Sesetengah tempat tu jaley tanoh campur nga batu hudoh2. Hok perit sekali keno ko time hujey, habis berdenir kopey kasut keno selut. Cabut habis stokin, kasut, jaley kok daley selut, beley2 bimbit kasut, cedey nok paka di tempat kering. Jupo tempat kering baru lah sauk semula kasut stokin. Kabar2 berdaroh celoh jari kaki keno ketik ko pacat. Gitu lah seksanya nok buleh ko ilmu sebutir. Tapi dulu Mok Pok harap jaley kaki sorey diri walaupun jaley tu sunyi jauh dengan rumoh orey sekalipun pasal dulu x dok mano kes pelik2 serupo hari ini.

Dulu2 sekoloh sebutir2 ni jauh2. Jadi x pelik lah kalu ado orey jaley kaki sapa 2, 3 batu nok buleh nyapa ko sekoloh. Hok rumoh di birai pagar sekoloh tu x apo lah. Keno hok duk jauh gak, tapok kasut padey haus jaso tu jah. Tapi bunyi jah jauh, tapi dey main hari2 gak, jadi galir doh. Berat beg x soh duk cerito lah. Keno ko paka beg hijau tu gak, tali ngikat beg sandar atas dahi..... berkocok palo2 nok buleh nyapa ko rumoh. Tapi acu suruh loni jaley batu hari2, raso x dey sekerat jaley caro ko nok mitok tupey orey.

Balik sekoloh pun gitu jugok, kadey2 ikut jaley shortcut, jaley ramai2 dengan saing. Jaley kaki kok daley rok, niti atas titi, niti pulok kok atas batas padi, masuk pulok kok daley kebun getoh, baru lah jupo jaley kok daley kampung. Time niti atas batas padi, time kalu orey duk tengoh mukul sedap lah jaley mugo kering. Tapi kalu keno time orey duk tengoh cedung gak, berdenir kopey pulok kasut.

Tapi nok buleh ko sapa rumoh, dey lagi heret kayu api seputung duo wat balik rumoh. Main pelago butir getoh dulu sepukul duo. Kalu jupo payo mano2, turun igak ikey sepila pulok. Dey lagi kutip pelago sepila. Mugo dulu waktu sekoloh pun, paling terik pun sekat pukul 1 jah. Kalu hari Rabu Khamis pukul 12 balik doh. Maso tu banyok lajok nok main.

Habis mainey lah kutip main nok buleh nyapa ko rumoh. Dengan uniform2 pun x salin lagi. Doh lah uniform ado sela tu jah x dok lok lo. Esok lusa sauk uniform tu lah pulok, bereti dop gak, jupo hari jumaat ko Sabtu baru lah caro ko nok basuh pulok.

Sekian. Terima kasih. Baca sampai habis ke? Ada faham? Jika faham baguslah. Jika dok faham, kena guna Google Translate..hehehe...