Umumnya di negeri Kelate, terutamanya masyarakat dulu2, jarey2 orey terutamanya golongan tua hok panggil teksi. Kebanyakan orey2 dulu lebih selesa panggil kheto plate, ataupun kheto sewa. Kalu tengok ko plate atas bumbung kheto tu sendiri dio tulis kereta sewa dan bukannya teksi seperti negeri2 luar. Manakala bagi perkataan teksi daley masyarakat Kelate, lebih merujuk kepada beca. Ataupun sesetengah orey panggil teksi gatih. Orey Kelate x panggil beca, tebeng panggil beca, demo kato bau budu bengar2 jah ni, x pun hok tambey teksi 2 riyal, keno caj 4 riyal la.....

Kerjaya drebar kheto plate satu maso dulu, antara kerjaya sohor bagi masyarakat Kelate. Terdapat mungkin sampai ribuan kheto plate atas tembok ibu serata di bumi Kelate satu maso dulu. Secara pukul rato, kurey2 ado paling x dok pun sorey drebar kheto plate daley sebutir kampung. Dulu2 memey meriah dengan kehadiran kheto plate atas jaley. Persatuan Kereta Sewa seluruh Kelantan pun maso tu hidup dan aktif sebab ahli persatuan ni ramai .

Ado 3 kategori kheto plate ni, kategori pertama, kheto milik persendirian dengan permit sendiri. Yang kedua kheto plate sendiri tapi gantung permit orey dengan bayaran sekian2. Sekalo nyo, permit dibayar setahun sekali ko tuey permit. Manakala satu lagi kategori, sewa kheto orey dengan kadar bayaran 20 - 30 riyal sari.

Dulu2 set2 drebar kheto plate ni rok cari makey dan buleh wat pitih. Mugo maso tu jarey orey ado kenaikan sendiri. Badi tewas lah maso tu dengan bas. Maso tu x pelik lah kalu drebar kheto plate gi hantar pasanjey dari Kota Bharu ko Kuala Terengganu, lepas tu lipat turun pulok, x dey masuk Jerteh lagi, penuh doh pasanjey atas kheto hok nok gi kota Bharu. Dulu2 biasa jah , orey dok di Ganu, mari shopping di Kota Bharu. Tu x kiro lagi set2 drebar kheto plate ni hungar naik sampai ko Hentian Putra tamboh2 kalu musim rayo, mari narik orey. Pitih lah set2 drebar maso tu, jadi x pelik lah kalu drebar kheto sewa ni, buleh buat rumoh baru dan ramai dikalangan drebar kheto plate ni bini duo !!! 

Kheto plate atas jaley maso tu, kebanyakan dari model Mercedes, termasuklah Mercedes Batman hok buleh duduk sampai 3 - 4 orey alik depey termasuk nga drebar. Ado model Nissan, Datsun Uto. Kalu model Datsun woh ulu jarey2 drebar kheto plate tempat kito ni guno, mungkin takut bekok kalu jaley time waktu hujey. Biasanya kheto plate maso tu jenis besar sebab bukey sajo untuk muat pasanjey, kadey2 pah ko jog buluh wat isi lakso pun muat bubuh lagi daley boot. Daley kheto x soh duk cerito lah, selagi buleh muat orey, selagi tu isi. Nok2 pulok keno ko hari Sabtu, time rayo, cuti sekoloh nga hari megey poso, aloss nok buleh ko kheto plate pun nya payoh. Tu gak, daley kheto, duk bersumbak sumbak. Kadey2 keno duk beribo .

Duk berdepek tino jatey, kalu keno duk sebeloh gewey, jadi khijo jugok. Kalu time duk sebeloh nga tok peraih, mulut beley2 duk mamoh sireh. Aloss dugar lah nok buleh nyapa. Tu x kiro lagi macey2 bau ado daley kheto, mugo bukey nyo ado air freshner pun. Nasib lah. Duk nyupoh bau busuk kheto sewa, kabar2 bau busuk mari dari kito sendiri, ado tepek lekat tahi kucing di tapok selipar Tat Seng. 

Kheto plate jamey dulu, nok jupo kheto baru, daley 100 butir, bokali ado lah sebutir. Tu pun kalu ado.

Kalu Nissan Blue Bird tu kelas ilir menah doh tu klu nya wat sebagai kheto plate. Nok jupo kheto plate ado aircond maso tu, ado tu ado. Tapi jarey2 sebutir. Kalu radio jadi pun kiro mujur doh. Kalu ado pun, ado lah kipas kecik duk di dashboard. Tu pun tala ko drebar sajo. Jadi drebar sajo hok panas! 

Kalu keno ko musim hujey hok sedih sekali, cermin tu gak jadi berdebu. X pasal2 pah ko pasanjey keno genyeh cermin guno kain tuala Good Morning.

Di Kota Bharu jamey ritu, duo stesen kheto sewa paling sohor, satu di sebeloh Bangunan Tabung Haji dan satu lagi berdekatan Kedai Kopi Cino Pendek. Kheto Plate dey masuk stesen, x leh ambil pasanjey daley tu sesuka hati, kalu tidok gak gocoh.

Keno ambil nombor giliran terlebih dulu, beley2 nunggu trip, dey lagi set2 drebar duk tonyoh tudung botol atas papey aji. Bagi pasanjey hok naik di stesen, kurey2 keno ado 3 - 4 orey pasanjey, baru kheto bergerak. Meh2 serupo makey nasi pesen ngidey pat bekwoh zamey ritu nah nih. Keno ado 4 orey baru buleh makey .

Drebar kheto plate biasanya kebanyakan jenis peramah, jak lakoh masuk jah daley kheto, ado selaluh bendo hok nok bual. Royak jah nok gi mano, kampung mano. Nya tahu. Siapnya titih lagi, orey tu, orey ni. Hok tu kelebihan drebar kheto sewa ni. Tapi daley ramai2 drebar kheto plate ni, ado lah sorey duo hok nakal. Kalu keno bowok orey bujey, x soh duk tehey lah, lambai lah tangey lagu mano, nya x berhenti. Bowok kheto tu gak slow, serupo kuro katup. Nok suruh lambat sampai.

Doh lah x berhenti ambil orey, orey bujey turun pun, pitih nambey pun x ambil lagi. Mapuh pozek main lagu ni! 

Sumber: Gary FarezAmbo Ore Kelate